Tasekla tamaḍlant n w-azzan: Asuni aceghnaf

Yan w-ass gh w-ussan, yaghul-d (yuḍa-d) yan usuni s taddart ns, izger tagant, yanni yat tmayast (panthère) tama n yat tmda. Ibedd, iḍuf-tt a lli gh tkkes tahiḍurt ns, temmatti teg yat terbat tafalkayt mmiyẓelyawen (bahra iẓilen).

Tizi lli gh tekcem aman ad teslil, issides (iqerreb) urgaz an s tama n temda s kra n tsurifin (tizemmuẓal) tifessasin, izbu tahiḍurt n tmayast, isers-tt in gh uqrab ns, irwel s tazzla ad intel d ad irekkwes.
Is-d ukan teffegh terbat zegh w-aman, ar tsiggil tahiḍurt nes. Mac, ur-d tt tufa, ar ilemma talla d ar tesḥuṭṭi. Issides (iqerreb) usuni s dar terbat, inna-y-as :
_ Ma-d am igan asrag ad tallat?
Trur-d awal tenna :
_ Lli gh ar ssiridegh, yuker iy kra n yan timelsit inew.
_ Amez addal ad tdelt sers, inna-y-as usuni.

Tessutel-d terbat addal i tgheṣṣa ns, tmun dis wattsen asun (aduwwar). Zrin mennaw w-ussan, yuwel (itahel) usuni tarbat an teg tameṭṭut ns tis snat. Dat (qbel) ad isker tameghra, yules i tmeṭṭut ns tamezwarut tallast n teslit tamaynut lli ra-d as ig takna, awed adghar lli gh en iḥḍa (isserkwes) tahiḍurt n tmayast is as t imla.

Mac, tameṭṭut tamezwarut tga tanisemt (tameghyart), teg mmiyghnan d taẓit. Tayelgi n yan w-ass lli gh iffugh urgaz, ar tsutul ad-d tawwek taẓit ger as d takna ns. Mmergament (s’insulter) tmeṭṭutin, ar sghuyyunt, gin t en akw ifassen. Imikk, takwi-d tmezwarut tenna :
_ Ur ssengh max lli gh ar serm sawalegh, acku ur myaregh ad drugh awal d tmayasin. Igh kem ur tessusem tudert ad, ha-n tahiḍurt nem g tegnart daṛat n icelliqen (lxencet n tifest) n tfeght (rruz), asi tt tffeght d imi y ad ghil ad nit.

Tghawel tekna twattes tagnart, tels tahiḍurt nes, tmmeskel (tbudel) teg dagh tamayast. Ar tendder, tmel-d ukwaḍen (ixsan imsaden) ns, takwi-en f temghatrt n usuni tengh-tt, terwel tekcem tagant.
Tizi lli gd-d yurri (yaghul) usuni s taddart ns, yufa-en ixef ns iga adgal. Mac, iferk is-d nttan ad igan agwri y tmeṭṭutin ns, issels takesna (drame) i tudert ns, acku ur iqen imi ns d issigut awal.

Tasekla tamaḍlant n w-azzan (Tamurt n Saligan)
Asughel: amasine.

azul a gwma Zalhoud,

Tamezwarut, tanemmirt nek tafalkayt.
Tis snat, tallast ad tekcem gh tasekla n w-azzan, ttyasay-d gh taysi n ugherf Asaligan. Ittuyssan w-anaw ad adelsan s: Tasekla TamaDlant negh-d Taysi TamaDlant, zund tallasin negh-d ddmin n darengh lli kkusant id matengh dar matsent.
Anaw ad n usughel gh iger ad, ittuyssan sers Mass Muhemmad Akunad gh tazwara n tabrida nes taseklant, zund: Vasilisa tafalkayt, tiddukla, timilla ifersen...
Anaw ad adelsan iZli s tazzanin, gh uswir amezwaru, mac yufa kuyan ad-en gis yaf itigen imaDlanen n tiffugna.

Tanemmirt
Ar timlilit...
Amasine.