adghar : amsri n usalay amazigh.
akud: tiss 19h30 ass n ssbt 31/10/2009.
tadyant: anmuqqar amzwaru n tmsmunt n tirra “tazelgha n imaratn s tmazight”.
asntl: tirra s tmazight, man tayafut?
innkcmn:
issnta igiwr s tguri n umzwar n igiwr mass 3abdllah sabri lli isbrrkn inbgiwn ifk awal i mass 3bdllah buctart lli isawln f tzlgha d iwttasn ns d twwuriwin lli tra ad tskr gh mad-d yuckan n ussan, idfr t id mass Mohamed akunad amzwar n tzlgha, ifk yan usmmaql igzzuln f umzruy s tirra s tmazight, ifka kra n tugga d inagan lli immaln is jjun ur bddnt tirra dar imazighn mklli isawl f yan mnnaw inmghurn n uswingm d tskla n tmazight gh zik.
awal n mass Mohamed Oussous ar issutl f tirra n tmdyazt s tmazight, ibdr d gis arramn imzwura n tirra gh usays ad, mklli d yiwi f aylli d akkw iffghn ar ghilad n tawckinin d tadliwin n tmdyazin gr sus d rrif d atlas n wammas, mklli ibdr atig lli akkan kra n waggurn n tirra gh internet i tskla Tamazight, ibdr nit gisn ssit n “art amazigh” d “amaynu.net” d tuzunt d wiyyad, mklli isawl f udghar n twtmt gh usays ad.
awal n mass Zahur ntta yiwi d f wallas, ibDu imaratn n wanaw ad n tirra f mnnaw udmawn, ibdr aylli d iffghn ar ghilad gh ungaln d tullisin d idlisn n umiyn, ibDu gr aylli gan asnflul d aylli igan azzugz n taysi gh usays n tnfusin d umiyn.
awal n mass baha buctart ntta yiwi d f usughl s tmazight, isawl f kraD wanawn n usughl, walli izdin d usays n ddin, ikcm gis aylli iskr mass juhadi n twwuriwin gh usughl n lquran d lhadit d tgharst ngh tamackut n tudrt waysar (nnbi), wis sin walli izdin d usays n uzrf, tkcm gis twuri lli tskr tmaynut slawan akkw gh usughl n izrfan n ufgan d tatggart n 169 d usaDuf n takat, wis kraD wanawn ikcm gis asughl n tskla tamaDlant s tmazight.
tagara n unmuqqar ad lli igan tisit (lmri) n usgudi n idlisn gh tmazight, ssfldn islmadn i isqsitn d tannayin n middn n ugdud lli gh llan kigan n imaratn d infrann d inlmadn d imhDarn n tsdawit. mklli izri gh unmuqqar ad yan usfsr n idlisn lli gh ttwayfsarn tugt n idlisn lli hra d iffghn gh usays n tskla Tamazight tigariwin ad.
ultmatun: aziza NAFIA
Accueil 
Dernières images 
Dim 8 Nov - 16:33
