TAGHUSI ( i Ouagrar,Oussous,Houmir )

TAGHUSI



i Ouagrar, Oussous, Houmir




Ighus,izil,iffaw;sul ifk ikwlan d tujjut
Ajjig ann immghin ghw ammas nw arras n usggul
S titt nw ul
Ikmd i ugadir n uflla
Sul iddr ur iddr
Yafud ur yafud gh ugadir n ighir
Gh ingi ufgan war imal war iman war azmummi war ixf war ul
Yan ittutn s ghmklli s ittut
Ifrk ghmklli s ifrk
Issn ghmklli s issn
Ad iskr gh tama n umadal
Amadal ns iss izlin
Wins igan agwnsan
Wins ighusn mi ur issn agharas amr yan igan zund nttan
Amagus n tiddt
Anzgum d umzgun
Taskla d issfra
Ungal tullist ghd nttat
Tayri tanafalt n tguri d uskkil
Igiwr d ighiwr d inirn staranin
Ignwan n tlilli
Akal imdi gh usnfu
Llid iqqann
Ur dids izi
Macc anaw n ufgan ad
Issn is imda
Iwrrgh mqqar issngi timlli n idflan
S tzgzut n igran
Ahh a taghusi !
Ahh a taguri igan asafar
Nw attan n ufkka d iman
Idrus yan yufan abrid n taghult
Magh ijmk afraw n timlli nm
Axzuz amllal n tlalit ar axzuz amllal
Gh ibbuttl yan yafudn
Timlsit tamzwarut
Timlsit tamggarut
Tin tumrt gh imriri n tudrt
Tin umtta n tfughalt n timdlt
Mohamed yufa timlli ismrghan isklulun udmawn llasnin
Tiwallin ttasnin
Ulawn lluzzanin
Hat!Manzat?Manwa?Ouagrar!
Yah!Hatinn issuda!
Zright urt zrigh
Akud igzzul
Ighzzif ubrid lli radd irar abudrar s udrar
Igr n tirra ur yi isurf ad smummuygh ar allagh
Addad n iman gh zrigh Ouagrar Oussous Houmir
Ad righ ad fllas als
Aragh imikk gh gigan n isyafatn n umuddu s ugadir
Agadir?
Ayhayya wayhayya!!!
Gigh inigi asigh tamasayt nw awal inu tg tugga nu tawrikt
Ssn a yan iran d yan ur irin
Izd ulus iqqand kra igan tasga
Kra igan ida sul ighaman ighus
Tasrtit n ihrurn
Azaghar gis talughi
Adrar yattuy ixxuy gis isiwan
Macc ghd nttan ar ittlls imikk s imikk !!!
Zuzdgh ad drugh akud d aytma ur turu immi
Lli ganin aytma gh ubrid n taskla
Lli ganin aytma gh ubrid nw attan
Lli ganin aytma gh ubrid n twwargit
Lli ganin aytma gh ubrid n tilawt
Ssirmgh iwiz didsn tillas ar tifawt
Macc zbigh
Tizi
Acku rbigh
Adrar inu
Arraw inu
Isddi inu
Argan inu
Agdid imyarn afatn
Ur izmr i tudrt n izughar


Zalhoud

Tfjjij tmdyazt ad nk a dda zalhoud,ad agh k yajj rbbi...!
nzêra k aylligh k yuma ugadir n ighir,macc win uflla is ar ka t inn nttannay zzegh tuggugt...ar bahra ittfalkay ugadir n ighir igh t id tssuggit zzegh ugadir n uflla slawan dd akkw diyyîd ...yah tghwzânt igzzul unmiqqir macc yatfût ig as rbbi tisnt..rad as nals i unmuqqar nzzighzift,ig iyyt lhâl gh ugadir nigh tafrawt,nigh mani yadnin

Tanmirt f trzzift , tanmmirt f tamimt n n tguriwin nk a gwmanu...

Azul Mohamed Ouagrar
Tssusm k tmdyazt
Tssusm iyi tguri lli fllas tnnit
Tanmmirt
Ar timlilit
Ujjigh ak afulki d ufra d tumrt gh tudrt
Gwmak Zalhoud

azul mass farid
ar k bahra snimirgh a gwma nu f wawal ad nk immimn, f tmdyazt ad lli iyi isfrujjan tasa, ssngh is d tkka adif n iman nk tsu d gh wasa n ul nk, tasi timitar n tiddukkla d tgwmat izdgn ighusn. ar k bahra fllas ssimghurgh acku tga tisit n tZnint n ufgan ann imlluln lli gik izdghn, afgan ittutn f tlelli d tdrfit d tayri n udrar yattuyn! amazigh ann lli tgit zund igidr n ignwan ur as iktur alln amr afatn yattuyn.

Azul gwma Mohamed

Tanmmirt f tigurwin nk zgh ul ar ul tin umdyaz i umdyaz tin tiddukla i tiddulka !!!!!
Ar timlilit
gwmak Zalhoud

azul gwmanu zalhoud

fulkint marra timdyazink ,mmiment ! ayuuuuz nk !


ayuuuuz i imdyazn zalhoud ougrar oussous ... i imdyazn imazighn marra !

Azul tabrzzuyt n timazighin Warassagh
Ar km ssimghurgh ar km snimmirgh f tigurwin nm zilnin zlinin s tmdyazt inu
S tumrt gmigh mad tarat
S tumrt ar am ttinigh ad nn ur ttmatalt

Gwmam Zalhoud

Azul ultma Tanirt
tanmmirt f iwaliwn nm zilinin zlinin s tmdyazt llid iluln gh umuddu inu s ugadir
ar tayyad
ar timlilit
Ujjigh am afulki d ufra d tumrt gh tudrt

Gwmam Zalhoud

azul fllawn
azul zalhoud tamdyazt tssusm tslmssa koullo s tghussi tkd ul ighussn iwayad .
nhml taghsussi tgam taghussi nkni nra taghussi .awal n umdyaz ur igi amr nttat ayouz
tanmiiiirt amdyaz ngh

Azul ultma Tinurgh

Awal nw urgh a Tinurgh
Tanmmirt

Zalhoud