Talalit n unaruz

Ilul-d w-azzan issizwar-d taghwyit
Inna hay uckigh-d, ara ma-d teḥḍit
Rẓemnt as tiggura n tudert
Fseln-t ula tin tumert
Gan-t imi war ifelwan, gan-t azilal

Irẓem tițțawin, annin tifawin
Annin ula taḍsa gh tudmawin
D timelli gh tulawin

Afus s ufus
Ighil s ighil
Tadawt terba
Anaruz n imal ad telsa
tițț ar tsmerqa
taẓult n usaruf as teghwma
tzemzem tmimmit, tefsa
ajjig n imi n tergwa
aflilu n ger temẓin ad tga
azemzgh nes, azwiwgh amusegh
kerzen gis tiẓilt
kwfsen gis tumert

ilul-d w-azzan zund ayyur gh igenwan
ssuteln as itran, asli nsen ad gan
gan-t ayt dares d usafu da issinifen tillas
issisfiw abrid amallas
zzuẓden imal ifawen d taghlaghalt n inuraz

ilul-d w-azzan, ig yad argaz n udimal
gan asagwel, irba taẓayt n tdaliwin
d inezgumen n iḍgam
asin taggwat n twargiwin
d tikeṣṣad imḍeln gh w-ulawen
gan aghbalu n w-aman izeddagen
swan imrufa, rẓin irafan
gan urtan n ujjig iflulan
usin tujjutin d w-amud
asin timitar n usekka
rbun tabrat n imal