Axzuz ar axzuz ( Tarezzift i War assagh )

Zalhoud a écrit:

Axzuz ar axzuz

Tarezzift i war assagh


Sbuttel iyi ay immi gh ubruj n uxzuz
Udden iyi nn a baba nu gh umezzugh
Akwfay lli ssummegh afekka ad usin
Anneli d ufrak tasraft illuz icc w akuz
Isli lli kkusegh ur ratt sar akkwneffugh
Tinmel n taghadin slagh igdad ay susin
Tiddet mad agh akkw za temlit ay afgan
Amr ametta ijdern asetta tayri izzuceln gh ifergan
Gigan d unegmirs agedrur n inzar adu n tazzanin
Gigan d useggwas ad usigh anezgum
Macc igad Rebbi timatarin is iyi igum
Ad gigh d ugdid tigira yad n tudert
Abrid afella tama i iniren n tumert
Inin it ad gigh d unafal
Ad gigh nekki dw afal
F tuzunin


Zalhoud :fleur:

azul ahul agelid n imedyazn !!

tanemmirt gwmanu f trezzift ed yi bahra issusmn ,izan g ullinu attas n tumert !!! yuda igh tukzt is illa mad serk isllan mad k isyafan mad issen maf tnudit ,mad fellak isawaln s awal immimn ,ikerj ger tifras n udemnk azmumg s tumert !! tudayi tagwmatnk tiduklank g tudert ed !!

tdrus tanemmirt attas ,mac ur ufigh kran tguri yugern "tanemmirt"!!!
rad akwrgh tijdigin n urtan n umadael ad ,marra,aragh s tifrawinsn t yat tanemmirt meqqurn

tanemmirt agellid n imedyazn !
:fleur: :fleur: :fleur: :fleur: :fleur: :fleur: :fleur:

Arak ssirimegh tudert gh tumert f tarzzift ad n ultmatengh tamadyazt war assagh, iwalwn inemghourn twaranin
s ufus n agllid n imdyazd,
tanemmirt nk s madidnegh tubdit :fleur:

Taylalt

azul, tanmirt amdyaz f udêris ad nk izîlen, macc llant yan snat tguriwin ur ukzgh ammak nnsnt, is tufit ad iyi tinit mad gant, ma mi ttinim: axzuz - abruj?
tanmirt f tmkilt ad n iskkiln ittwaystayn lli agh tssmdît

tanmirt mass farid f isisfiwn nk, ar-k ssimghurgh, g mad izêlin s urur nk f usqsi hann ghrigh-t mnck aya macc ur righ ad dik kcmgh tanqqarmut acku ur gigh anaw lli-tt ittawin gh tghawsiwin imzzîyn ifl imukrisn imqqurn, ssngh aggur ad iga win tskla d tzûri d tussna tamazight ad-t najj ad ighama mkann ad ismun imdyazn d imaratn ur-d ad-tn ibdû, maxx lligh ak nnigh maya, acku zêrigh-k nit dagh tnnit iyi is yuf yadlli ad ur aragh s tfransist, yuf ad aragh mayann lli nnigh s tmazight, mqqar kiyyi s ixf nk tssnt is iga tidt ngh-d yan udm gh udmawn ns, yah gigh afna n taydyulujiyin ittkksn izrfan zund taydyulujit taqawmajit ta3rabt, sghuyygh inigh, gagh taghuyyit mrawt tkkal, yan itthucn ur ar iddal tamart! ssngh is ggutn wanawn lli ittasin tamukrist n falastîn ad sis zznzan taqawmajit, ssnghtn irwas is tn tssnt ula kiyyi! macc urd amdyaz af sawlgh taqawmajit d wanaw ns lli iskrn gh tmmara n ufgan n falastin asrghu n takat ns, gn-tt d wayyis n trwad ad sis zzrayn iswingimn nsn ittksn i wiyyad lli illan ddu ifassn nnsn izrfan nnsn.
mayad tssnt ssnght, mamk s rad-t inigh d man ils, maya-nn iga winu, gagh gis ilelli, ad-t inigh s mklli ka righ! ur idrus wattân inu f ayt libya g nffusa f wattân inu f ufgan n falastin, macc ssmyarn agh id bab n uswingm a3rab ad nzêrra tammara nnsn nttu talli iskrn i wiyyad, maxx ur-d a3rabn ngh willi yusin iswingimn nnsn ad inghan uggar n mlyun n ifriqiyn gh darfur g ssudan manwatn yaddrn gh dar wa3rabn assa?
illa kra iga aggas rad as tsslst timlsit n umarg tdl-tt s ifugga n tuwlafin d usmrgha n tguriwin, illa kra inwa gik trit ad-t tinit mklli iga isqqaq iqqur iqjr, ajj-t ad-d iffagh, ad ak ur ig yan algammu, ula tsyafat is illa mad gik iran ad tfisst g yan waggur lli s tnnit iga win-k, ig win tlelli!
hayi mass farid ssugigh-d dagh awlk inu, ffigh dagh aylli gigi iffrn, imdyazn hati ur darsn mad hêddûn, yiwi-d akkw wawal aylli issntl wul!
tanmirt nk tikklt yadên, ha yat tmdyazt righ ad ak-tt gagh d trzzift:
tayrrist n twngimt

wanna ra kk yass,
ur d uzzal as ira akk ikrf !
ra d ak ignu tawngimt
ikrf ak ul nk,
ra d ak isghal is iga
ixf nnun aghanim
ig azuzwu,
ismdudi-k s mklli ka ran !
ra d ak iskr s ighadiwn
timlsa wawal..
rad ak ighmu s ibadân
annay n tît nk,
ra k izazwul s tiggas
asa n iman nk..
ittl ils nk s tiddâ
init as : immim !

tanmirt mass farid f izlan nk immimn, ar gik ssimghurgh ul nk mqqurn n umdyaz ittqbaln aswingm yadên, d tayri nk taxatart lli ur ittmdudiyn i tmazight d tskla ns.

amdyaz ay aylal izggrn i wakal tasa ns
irzêm i tayri gh ignna ad lkmnt afa ns
ikks i tguri fad ad-d tnssis tala ns