Taskkiwt n tbpirt II

Taskkiwt n tbpirt. Agzzum Wis02 n tallast n GUY DE MAUPASSANT s tmazivt

Temmezwu g is yat tudert n udagaz s uzubdu. Da tsnara mant imiss,min trar anlli s mad tlha,di takti ad as n ittwvi as d iluln g ixf is “Ikut iv d iwin anvmis I tberrant is”
Iqqen t ukmar ar sul tgammi ad tswingim, taf allaln sa ttanf I tzerzhunt tssugga dat is ar d ttakmur unck lli sa n isitti wass gwma’s inva,tdmin t am artum mmu ur tnjem viklli tamttant.
Da tduy,ur ta d iduy kra g iga Wakc iman,kuy taylgi s ccil,tmnid tiddi ns v yan ufrukc n tisit,as d ivaman ar g is trsam azzar is, tnukmu ad tssen is ur igi assa ar ad s ferkn. Kra ikka wass,va tsnvtam isniritn is ,ar tssiwin allen is I ufriwl lli tlsa zi tfenza ar tukdht,yak ur t id isuff uplig is.
Iyyirn da zrayn, ar g is ittidrus wawal aylliv a t id ur ittawn, kud s is isawl yan, tssakwid allen zun tafunast izzema ganga,tdehs,ar trgigin ifassn is,aya ad yudjan akrwa ns ad yini:
“Tigllint iw, mad flla m igguran tigariwin ad, tduhllit!”
Di tiglizt, tntel bdda tivuedin n ucamuc,d ur n jju tpada assikez (confesses), ar trawal I ukhhan s tval is itthaf tizmert taflast s izdhar ad yaqra ufurn.
Dar tirmt,asmaqql n imeggawrn d is, ar issuvul ifadden is gan aman,s unurjf,slawant,ar as d iskar waddad n umksa n twala, is as iferk, yan uoddar anabur t icttan s wallen is.
Yan zikk, arqqas yiwi as d yat tbrat,talli jjun ur isran kra tkka tlla dinna, tvama rwi, tcuwwr aylliv tumz akal. Vur is irwas? Mkan ur tssin ad tstay ger iskkiln d taccrafin, tupl dat n tifert ad idel ssemp. Trar t I wakes is, tgummi ad tml ufur is I awdhpap, yati mav tfl tawwuri ns tasi t id ar tmnad izirgn sttefnin g idhrfan,hyyun s uzwil, da ukan tval ad s is yawgg wammak lli tusi. Tzdi mkan aylliv ifta unuvjf d warizidhr as t snhattafn, taf sul aslmad n uvrbiz lli s t isggawrn iver:
“ Tanbruzt iw, mimmi, tad tga ad am iniv is ur gi gi iffuv umyan udhnv bahra; ayjar nv dda Dantu ad yusin avanib ad am itter ad d tackit iv as tufit.
I ma’m lli inva umarg nm
“ Sizhir Dantu, amawas”
Ur as d yiwn uncudh, tmatti tftu; amki tga fvnit g uvzur n saska, tdher v ir n ubrid, ifadden mmergan, tvama dinna ar idh.
Mad tudha, tuls agacur is I bu tbpirt lli t yudjan ad teddu unckk nna s t yudan, izer mad ittamzn amras is ar d turri.
Ma’s tlla g ubuxrur, temmt assa n tucka; tasskkatan Ruza tsunfa, tlal d tslmya n sa yyirn, yan uskkidh igwzan, yamum iwerrvn, issav iwriv, irwas is irfufn, mklli tmrratnt tifassin is isdidn am tin iverdm-n-waman.
Tbder a sn ma s trcl, altu ur tufi ad d is tawi azzan is, tfl t I inaragn is as yugzn ad s t g is awin zun iwi tsn.
Tavul.
Mac izzi n ul is ayuzdaw g is tmmut tayri, tali d am tafilla, tamu unsrif an mzzin, lli n tfl g ugama ns , tsmd as tarfafant I tayya, ar g is tgadh ku tusdadt d is tngara.
Ar bahra t itmrrat uvdjaj t ittasin ad t tssuden tpbbel asd ifassn, tzdi t in d is tsyafa tirvi n tfkka ns, imzzipkukn. Ur ar sul tggan, idh, ass kra ila ar g is tswingim.
Tidwkkatin, tizi thyya twwuri ns da tskkiwis tanila n ulmsi ur ar g is tkkis tith mklli midden iswingimn g tuggugt.
Ilmmadin ar ssentin ar sihithirn xf usntl is, da g is kssern s umaray d trur, is izhil, is igumrd, is ila ayda,man tur tamvra, man agu tazruzt? Ur a tssan ad n taf ixef is tgedh v imetthawn s isqsitn ad ijddern tasa ns zun assfud isddiqisn v izger ilm is.