Ayyuz Ayyuz i mass Taied AMGROUD bab n "Ugwzirn"

Azul fllawn,


issufgh d mass tayyib amgrud tawckint ns tis snat n tmdyazin ussan ad nit ig as s ism ugwzirn.
ugwzirn gh tmazight gan tn idgharn lli iffrghn anfn i uärf yughghdn igh ur issn walli ikkrzn ad yamç awllu ngh as iffrtl, isti umgrud taguri ad afad ad tg tamatart n tmukrisn d udmawn n tfrghi gh tudrt d talla n imazighn.
adlis ad iga wis sin n mass tayyib amgrud acku issufgh d yad gh 2008 tadla izwarn s ism n “agad n tidt”.
izêli umgrud s tgharast ns gh tmdyazt acku anaw n imdyazn lli issnmn tiguriwin n tmazight isu-d g isaffn iqburn, macc yugga nn s wafatn n tirra titrarin, mayan af nn ttafa idêrisn ns utn s izûran nnsn gh tgharasin tiqqburin macc zdin d tinayt.
ighi mass amgrud ad yara s kigan n tgharasin, ismun gr kigan n udmawn n tmdyazt gh tmazgha, yura gh wasif n sidi hmmu n sus ula win ccix mhnd umhnd n lqbayl, yura s tgharast n azayku mklli yura s tgharast tartar.
tazwart n udlis iskr tt mass akunad, yini gis: “ïïiyib Amgrud içli xf tugt n imdyazn yaän, acku ass lli d ilul yufa-d (rribab) d (luïar) yaf d amarg g tama n uhlallu (berceau) ns, tawja ns tga tin umarg, ilmma yufa-d aghbalu, iddm nit ar issa s turawin, ur igi takunt (étrange) ad ittazzal umarg g tghssa ns mk lli ttazzaln idammn n tudrt g ul ns, ass lli issnta ar ittini amarg, inna-t s imassn ns, yini-t s insayn ns (traditions); mk lli s ar t-ttinin ëëways, s tgharast ns tamnsayt lli ibddn xf tlalayt, d iwlafn (images) inmyarn lli xf yad ftan ayt umarg aqbur.
macc artum (destin) n umdyaz ngh ur as isti ad ig ëëays, isti as kra lli nn yaggugn xf tçuri ad: isti as ur d ghas ad ig aslmad, macc nnig mk ann ad ig yan g imghnasn n tmazight.
G jaj n umussu amazigh yugm dagh umdyaz ngh g yan ughbalu yaän: yat tussna ighban (idran) xf tutlayt tamazight, d umzruy ns, d inmghurn ns d tkaylalin (ambitions) n tarwa ns d usmmaqql nnsn i imal n tmazight d imazighn;
Tussna ad tamaynut trks d tussna tamnsayt (traditionnelle), llig rksnt, mmkcmnt grasnt fkant yan wanaw idrus ad yili dar kra n umdyaz amazigh yaän lli ittuwssann ar ass ad.
ilmma g tadla n Uåzirn da nn ittafa imghri tifras n snat tussniwin ad:
- tamdyazt isdan f tlalayt (oralité) lli ittuwssann dar ayt umarg aqqbur,
- iwlafn imnsayn ifawn, ur sghawsan g tmghrit d imghri ad ttëççan ixfawn nnsn afad ad tnt ëmsn (comprendre),
- inaw (discours) anmyar lli yusin tamussni (sagesse) idran, tg takasit (héritage) tamnsayt n umarg ngh.
macc dagh iwlafn imaynutn, d tlalayt immëçan, inaw atrar anfrak lli d ipbbln i imukrisn n uzmz ad d tutlayt izdgn…. ».
adlis ad n mass amgrud gis 118 n tasna, ittyara uzgn ns s tlatinit d uzgn ns s tfinagh, gis 26 n tmdyazt immimn iktarn s inzgumn n imazight: akal ula afgan ula awal!

Azul azanaf agadir

Ar km ssimghurgh;ar km snimmirgh f unghmis ad llid tuznt izlin s tadla tamaynut n umdyaz Mass Tayeb Amgroud lli mi issagh"Igwzirn";ar asn nttini nekkwni gh Tafrawt "Iguran".
Ayyuz ns f talalit n tadla nes n timdyazin tiss snat
Ar as ssirimgh imal ibughlan d tayafut d tawada ifsusen gh igr n taskal tamazight!
Ar timlilit
gwmam Zalhoud