M.Akunad: Mad igan ad ttarat s tmazight gh uzmz ad?

Mad igan ad ttarat s tmazight gh uzmz ad?
Man azmz, Man tirra?

Man azmz?

Nik issihl iy uzmz n tmazgha, issihl iy uggar uzmz n wamurakc(Maroc) acku sfawgh t uggar n tmura yadn lli ganin tinw, mac ssngh fllasnt mad idrusn.
rad tnnit: mac tamazgha tga tamurt, ngh timura,(pays) ur tgi azmz, ngh asru(temps)?
Ad ak inigh: ku tamurt tla azmz ns, max llant tmura n tmazgha ass ad g uzmz n Amrika mqqar tnt ak tsmun tasut tiss simrawt d yat?
Ilmma man anaw n uzmz ad illan ass ad g tmazgha?
Ad inigh: ass ad illa uzmz n tnghi n tmazight dar tnbadin lli igan imazighn g ufus n uzzal, ar asn tbbi izuran ar sisn, d ar gisn tdssa!.
yili uzmz n yat tmdrust g tarwa n imazighn ur rin nttni ad ngirin d twargit s yan imal issghn i tmazight,(avenir radieux) aywan ar ttaran, ar skarn asnflul ur ssnn mani sis ran, mac aywan ar skarn, ur ar ttrkkikn, illa uzmz n igdudn n imazighn lli xf ttmmagh tnbadt ad asn tsghr tamagit skud(tant que) urta d nkrn.
Ilmma tirra s tmazight g uzmz ad, gant taghnsa,taghnsa isqqaqn, acku da akkant yat tagga(yat n tugga) is tlla tmazight tddr, uggar n mk ann, tlla g uswir n tutlayin yadn lli ddrnin ass ad, igh as ittuwfka mqqar d imik g wayda lli igan wins, ur d ghas is rad tbughlu, mac rad tfsi igiman(milliers) d igiman n imukrisn lli g ar tthctarnt tmura ngh.
mac g dar willi mmi nga ixfawn ngh g ifassn nsn, ur sul nssn mamk s rad tn d nkkis, wid nttni yuf darsn ad nn aghnt tmura n imazighn arwass, ula bddnt s tmazight, nttni ggummin ad zrn tamagit tamzight tga tinsn, tzdi asn d trzi, tga innatsn lli nghan xf ad biddn s wayda nsn ilin, ad tbdd tmazight, iga darsn ad tqrbl ddunit nsn, ad d aggint tkrkas lli ikrfn middn tasutin d tasutin.ad tbidd tmazight iga t ad ssn middn tidt talli tt igan ad d bagn irgazn d tmgharin lli ganin inmghurn s tidtd;;;. inna yan gisn llig urta d kcmn irumiyn s tmurt ad: yuf ad agh amzn irumiyn, ula umzn agh “lbarabr”tirra s tmazight ar kkatnt xf ad snflnt udm i tmazirt ad ur d s idammn d irwwayn, mac s tghrma d tigawin ghudanin.
Tirra s tmazight gant anazar, gant anaruz, ar ttinint: ha imazuighn llan, rad ilin.alid rad ilin.

Man tirra?

A-tirra xf tmazight:

gant tnt tirra s tutlayin yadn lli sawalnin xf tmazight, anaw ad iga aqbur , izbdu nit sul g uzmz ad.
Zg zik uran middn xf tmazight s tutlayin yadn, nzmr ad nini:ggutn gisn ijuritn n tmazight,
- Wid uran fllas zg zik zdin dis mad akw igan gar, idrus man akud nn nttafa g wanaw ad n tirra mas gan imazighn aghrf ibiddn xf ixf ns ig anggu n wiyad, ula is tga tmazight tutlayt, tga dar ijuritn ad ghas tantala, g kra n tkkal, tga darsn tantala ibjrn n taarabt, ijuritn n tmazight g zik ur bdda gin imzza xf tmazight, tugtt nsn gan nit imazighn, mac llig umzn g tutlayin yadn, ilin sisnt addur, ssmziyn tutlayt nsn, ar ttmaghn igh ufan ad akw dis ur zdin s kra n mamk.
ar skarn addagn n tkrkas lli tnt d isqqurrin ad nn zdin ixfawn nsn d ayt iming, ngh landalus ngh l’Iraq, ngh mad t irwasn, ur ar ttrwaln ghas i tmazight lli ighzann is tga matsn.
Adriz ihrcn n wanaw ad n tirra, ikka tt inn nttan hlli ad inbdn tarwa n tmazgha, nttan ad ukan sul inbdn ikrf aswingm n tugtt n willi d tilli ganin afna n tmazight ass ad.ggummin willi d tilli llanin ddu udriz ad ad sar zrn g tmazight kra ur igin tirzi.
- Anaw wiss sin g tirra xf tmazight iga t aylli uran ngh ar ttaran imghnasn d tmghnasin imazighn ar ssutugn tamazight, mmaghn fllas ad tamz taghamt ns. tilalt(le role) n wanaw ad wiss sin iga tt g yat tsga: ad issanf gar adriz lli flnt tirra n ijuritn(adversaires) n tmazight n zik, issagg d artutm(faiblesse) lli xf tbiddadnt tirra n ijuritn n uzmz ad.
imik ad lli tlkm tmazight ass ad tlkmt s wanaw ad n tirra timghnasin.
Tirra n tmghnasin d imghnasn ssuggant d tugtt n tghawsiwin lli izdin d umzruy n tmazight d imazighn, srsnt asqqsi xf tugtt n iwnnan lli yadlli izdin d imazighn, zund mad gan? D mani d kkan? Is nit iga umzruy lli fllasn ittyarn win tidt?
d is nit tga tmazight tutlayt zund tiyad nghd tga ghas tantala lli ur ilkmn mani?
s uzgzl, anaw ad iggran n tirra xf tmazight ad immaghn ad sghusnt udm,ur d ghas n tutlayt tamazight, mac n tmagit tamazight akw.
Rad bdda ighama wanaw ad tsghawsa sis tmazight.

yura tt mass M.Akunad
Source: amaynu.net

B- Max allig ar zzmawnt tirra s tmazight?

G imagradn ad izrin nsawl xf wanwn n tirra lli issutuln xf tmazight.
- Anaw lli fllas yuran xf ad tt issimzi, iluh s watig ns, zund aylli uran tugtt n inmzruyn lli uranin s taorabt g zik d will nit sul ittaran ass ad nit.
- Anaw lli yuran s tmazight llig as d ur ikki mani, tga dars ghas imiss n kra yadn: zund aylli uran imssann n lislam, Imzabn g Dzayr, d Ibadiyn n udrar n infusn g libya, d dar waggagn n sus zund awzal, d gw uhudig.(lhudaygi)
- Anaw lli fllas uran imghnasn ns, irin ad d issagg atig ns.
- Ighama ad nsawl xf yan wanaw lli bahra igan intti,(essential) yili yat tyafut iggutn; iga t ad ttaran imazighn s tutlayt nsn, acku tga ils n tmagit nsn, anaw ad n tirra ur ad nini:ur tt inn jjun ikki, acku ur nufi ad nttu tirmit n Ibrghwatn, lli akw skanin awank nsn xf tutlayt tamazight, mk lli d iqan ad ur nttu aylli snghuban imagzarn(ennemis) n tmazight lli g gan imazighn nit lli isnfln tamagit, g tghzi n umzruy;
manza aylli yura u Tghmrt(Bntumrt) s tmazight? ur ijli, is t snghuban,acku max allig ur ijli aylli yura s torabt? !(aoazzu ma yutlabu) uggar n mk ann hassan gw wazzan lli mi ttinin (izm n ifriqya da ittini g warra ns: (asnuml n afriqya) (…willi d rwlnin g Bghdad jdrn arrant n imazghn…)
ilmma rad nsawal xf tirra s tutlayt ngh ass lli ssntant timghnsin d imghnasn ar sis ttaran g uzmz llig frkn is nn llan xf yan umija(danger) immran: iga t ad lah taghrma nsn, nghubun akw, acku ssnn is tutlayt ad igan afrdis(élèment)axatar lli xf tbddad tmagit.
xf ad tghama tutlyt ngh g uzmz ad iqan ad tili g uswir n tutlayin yadn lli usinin tussna n wass ad, zmrnt ad ggrnt i imukrisn n ayt wakud ad.
Mqar idrus aylli ittyaran ar ass ad s tutlayt tamazight,mac adriz ns ixatr, izmr ad isndudi, igh akw ur irzi kra n itabutn kkan tt inn gan tisiwagh(entraves)dar imazighn, ur tn ujjin ad akzn atig lli illan dar tutlayt nsn, mk lli iga yat tskslt(fenétre) g ar d kccmn imagzarn ar ttinin: ma rad nskar s yat tantala lli ur ittyaran?!
Tizi lli g ar ittara ufgan s wawal ns ar ittgga bzziz xf wayad ad as ig izrkki(respect) izmr ad ighama iga afna ns, mac ur d llig drs imzzi, mac llig t iksud, ur yufi ad t yaki!
Tirra s tmazight skrnt yat tgrawla mqurn g wamun n tmazgha,idrus mad sis isyafan.
Anawn yadn n tzuri am sinima d umzgun, d izli(chanson) d unughn… ur ufin ad d laln s tidt allig yad ssntant tirra, aylli tt inn ikkan illa zdat n tirra izri g ayt tmmara iggutn d ar ittuwzra is iga aghas afulklur s wammak ihrcn n tguri ad.
G tizi ad nit, imagzarn ksudn bdda g tirra s tmazight, ur ksudn g tirra xf tmazight, timggura llant d sul g brra, llant nn darsn sfawn tnt, gan asnt iwtta lli rad nn sar ur zrint, mac tirra s tmazight, ur gint tinsn, da mmalnt is llan imazighn, ilin ils.
Imukrisn n tirra s tmazight ass ad ggutn, axatar gisn iga t llig sul gant ghas tin tufut,(élite) urta ttggrnt i ugdud, willi nbdnin mmaghn ad bdda ghamant tin tmdrust g ugdud.
S mk ann nit art n zzmawnt, acku ur ssnn mad ttinin imazighn s tutlayt nsn, d ur ssnn ma rad ig tayafut tanumant s tsrtant igh ddan imazighn ar d flsn is gaddan d willi tn inbdn.

yura tt mass M.Akunad
Source:amaynu.net