USSAN: UNGAL AMAYNUT N ḤAMID AT SLIMAN
Imdanen ttraǧun tayri. Tayri tefka-d udem seg igenwan. Yenguga yixef-is, yurew-d tiziri yefkan udem i leḥmala. imdanen gan-as isem:USSAN.
Tawenza n WUSSAN tessefk ad temlil d wemnay n tayri yettidiren di takurt tanilit. Lqeḍra tefka-d lewcayer-is.
Di lqaεa imdanen ggunin lehhu akked yiseγ, imezdaγ n Tumlit, tamurt yessan γef wakal-is aεlaw n lehna, umnen d akken Ussan yelli-s n leḥmala yis-s ara ṣeggmen wussan-nsen. Amedyaz yellan d amaεcuq, yeẓra anti i d Ussan. Leḥmala yellan d leεnaya γef tayri ad tawi ddew yifer-is Ussan akken kra yellan yura deg yixef n lawan ad yaweḍ γer lebγi-s.
Maca yella wayen n dir yeggunin akkin deg takurt tazegzawt. Bab n ccwal ur iḥemmel ara ad iwali imdanen ttuhennan. Ddγel yettεebbi deg wul-is ad yemmir akken ad yesgunsef ihayaden i d-yekkan si tmurt n rrmel, dɣa ad uγalen d iεdawen n tudert. Deg yiwen yiḍ ad hudden kra sbedden leqrun. Tumlit ad teγli deg wegraw n ccwal.
Tiwkilin n yiseγ ad nejlint si tmurt. Timess ad taweḍ igenni, kra yellan ad yuγal d iγiγden. Tejla tudert si tmurt ur nuklal.
Meẓyan yellan d mmi-s n uzekka , ad yeddu di later n Ussan akken ad jebren ayen i d-yeqqimen deg yiseγ. Amedyaz netta akked wemγar azemni d Leḥmala ad aγen abrid unadi γef laṣel amer ad ssefrun acu yeǧǧan tayri gar USSAN akked Wemnay n Tayri ad tt-ḥazen iγisan.
Di later n tikli-nsen ad kecmen γer lbaḍna yellan, ad mlilen d “wedlis n tirga” n Ussan, imir zdat wallen-nsen ad yeḍru imenγi aneggaru gar at lehhu akked d at ccwal deg wesqif yesburren leεnaya.
D wa i d agzul n wungal yura Mass Ait Slimane Ḥamid, i d-yeffγen deg wussan-a γur teẓrigin “édilivre” di Fransa. Ungal-agi yeḍleq-d timsal-is γef wazal n 192 tewriqin, yeẓẓuγur γer yixef n tudert, yeggar-d s annar tuttriwin iceγben amdan di yal tama: d acu i d tayri? Ayen lkerh akked d tismin? Am wakken diγ i d-yeggar tamuγli γer tenfusin n yitran yuzzlen. Deg wungal-agi, lqeḍra n igenwan temεebbar akked d lebγi n yemdanen akken di taggara, ad iban belli ḥala s tezmert akked d tasa yesεa deg yiman-is i yezmer umdan ad yessenquqel lmektub.
Deg tedmi n Mass Hamid Ait Slimane , ungal -agi yuran s trumit tewwi-d ad yuγal γer teqbaylit. Asuqel-ines ad yeḍru deg wussan-a. Gar yedlisen yura Ḥamid, yella diγ wammud n tullisin i wumi isemma : “ Amunen mmi-s n tlelli” i d-yeffγen deg waggur n meγres yezrin sγur teẓrigin “oasis des artistes”. Am wakken ad d-yessufeγ deg wussan-a i d-iteddun yiwen wammud nniḍen n tullisin i wumi isemma “Taneẓruft”, ma di tmurt, yessaram diγ ad d-yessufeγ yiwen wungal nniḍen yura s teqbaylit: “Tawenza”.
Mass Hamid yettaru diγ isefra s teqbaylit akked d tefransist, am wakken diγ yettaru ticeqqufin umezgun s teqbaylit. Gar tmezgunin yura yernu ttwalεabent nezmer ad d-nebder: “Aqcic d uεeṭṭar” i d-yettwakksen seg tezlit n Ferḥat Imaziγen Imula, taceqquft n “Duminu” akked “Amedyaz d ufeylasuf”. Di taggara-yagi yettikki deg usufeγ n tceqquft i d-yettwakksen seg isefra n Muḥya “Mazal lxir γer zdat", i d-yewwin acḥal d arraz , s ddemma n terbaεt Tacemlit n tiddukla tadelsant Yusef U Qasi.
Wali deg uzeṭṭa : I tmuүli, atan anda ara tafem abruy seg udlis-agi
Accueil 
Dernières images 
Lun 1 Mar - 19:27
