Issufgh d mass Abdllah Sabri ungal ns amzwaru lli mi iga s ism « azrf akucam » sg tzrigin n tmaynut ayyaw n ayt Mllul, ayyaw ad lli ifkan tagara ad atig iggutn i twwuriwin n tussna lligh yad iskr yan ufilm f ssida, ar ijjujad yat tmzgunt izîln ussan ad. ungal ad ifulkin gh tirra ns ula tagharast lli s ittyara ula aswingm lli f ittsutul gis 120 n tasna, ittyara s uskkil alatini d tfinagh, iskr as tawlaft n usatl mass Muha mallal.
yucka d gh tzwart ittwayskarn i ungal ad mayad: “ungal n Sabri yusi g tzênint ns asmmaqql n yat tasut akkw lli ifrkn is illa mad stt ikrfn, iga tisit lli gh rad nn nghr udm n yat tufrint (élite) lli izziwz unzgum n tmazight. ungal ad iga inigi f usnfar aswangam (projet intellectuel) n bab ns d usmmaqql ns i umnid ngh g tmazirt ad lli igan tingh tg zund igh tt sul ur tgi, ur d ghas g iswingimn ns lli izuzufn addaln i udmawn n tnbadt iqqurn d ifassn lli agh ittakwrn imal ngh, macc s tutlayt ns awd nttat d tgharast ns lli s illm tiguriwin idran ifawn, acku bab n ungal iswa-d gh ighbula n tmazight, ismun gr tantaliwin n ils amazigh, izdâ imndi nnsnt g yan uzrg, issufgh-d gisnt yan izîd imlluln izdgn ighusn lli gh rad nn yaf walli-t ighran tâdfi iggutn.
azrf akucam mklli nit rad yanni imghri sg ism ns, ar iggar aznzâr ns f yat tmukrist izdin d wadif n uzmz amazigh, d iman n tussna ngh, tin uzrf ngh d tmitar ngh d talla ngh akkw, d « ibulduzirn » n uswingm d taydyulujiyt taorabuslamt lli iran ad irdl aynna sul ibddn sg igidar n tghrma ngh ! taswingmt idran s tutlayt immimn ifssusn, tamukrist ikrsn ittyasasn s wawal ifsusan ur iqqurn ur iqqjrn!
ungal ad iga amzwaru d iffghn gh usggwas ad n 2009, yuzzl fllas aylligh d yugga s tifawt mass salh agwrram s tkrrayt lli fllas yut gh tgmmi tumlilt.
nusi d gh tgara n ungal ad yan ugzzum yuda ad agh immaln anaw n tirra immimn n mass Sabri: “ ilsa ubniq tillas, ur tsfaw tît ultma-s, tarm nn tirgt n ussbsi ad tskr imik n tifawt macc tillas dusnt. alln n Muha rzêmnt, illf as nt yidês izug. kcmn-d gan sin : yan yusi ajnwi, yan tizikrt. krfn as ifassn tighurdin n tadawt, krfn as idârn iskubbr.
yamz as yan ixf idhî d amggrêd, isaka yas wayyâd ajnwi, ffin idammn. igr-d Muha sin imttâwn ixatarn: yazn tn i trbatin ns, ig nn tuggas ad igr wis krâd i tmghart ns, macc tamttant tlkm as d agayyu, zwunt walln ns.
Accueil 
Dernières images 
Sam 27 Mar - 23:14